وطن حسرتی - ادریس آقازاده سونگون (غمگین)

شعر وطن حسرتی به قلم استاد ادریس آقازاده در جواب به شعر الهیار اسدپور

وطن حسرتی

حورمتلی قارداشیم منیم سیرداشیم.
یازدیقین مکتوبو آلدیم سئویندیم.
اوخودوم شعرینی قلم یولداشیم.
درین خیاللارا دالدیم سئویندیم

دایاندی قارشیمدا بیر آن او داغلار.
ووقارلی داغلاردا من سنی گوردوم.
آخدی میصرالاردان بوزلو بولاغلار.
یام یاشیل گئیینن کووشه نی گوردوم.

کونلومو ایلهاما گه تیردین بیر آن.
چاغلادیم - چاغلادیم دئنیزلر کیمی.
آخدی گوزلریمده ن بوزلو بولاغلار
آغلادیم - آغلادیم کهریزلر کیمی.

توتدوم ائللریمین بیر آن سوراغین.
سنین قلمینده سنین شعرینده.
گوردوم منیم کیمی سنده یانیرسان.
وطن حسرتینده هیجران کوزونده.

وطن دردی بیزه یامان درد اولوب.
حسرتی گوزلرده ن سیله بیلمیریق.
یانیب فراقیندا اوره ک قوورولوب.
آغلایا - آغلایا گوله بیلمیریق.

پوزولدو نووراغی قارلی داغلاری.
یاشیل چمنلری گوی مئشه سیده.
گئتدی الیمیزده ن بوز بولاغلاری.
الوان چیچکلری بنووشه سیده.

بیر عدده نانکورلار وطن ساتدیلار.
دوغما یوردوموزو یادا وئردیلر.
فیتنه توره تدیلر آرا قاتدیلار.
اومور بهره سینی بادا وئردیلر

گور نئجه سالدیلار نادانلار گوزده ن.
یادلارین الینن تالان سالدیلار.
وفالی اولدولار اولنلر بیزده ن.
وطن قوجاغیندا یاتیب قالدیلار.

یئر سالیب ابدی قلبیمده اینان.
موقددس وطنین یاشیل چوللری.
دورور گوزلریمین اونونده هر آن.
سرین قجرلری بوز سورولری.

کونول دونیامیزا سالیر ول - وله.
اوتن اومروموزون ایندیسه نه یی.
داماخدا داد وئریر اینیده هله.
قویون قووتماجی تندیر چوره یی.

گوی بیچه نکلری احمد دره سی.
شیرین نغمه کیمی دوداغیمدادی.
نوولودا بهلولدا کرگه نین سه سی.
گئتمه ییب هله ده قولاغیمدادی.

ده ریز کولگه سینده سوزمه قاتیغی.
تندیر چوره گینن یئیردیق به - به.
کنده قاییداندا هر آخشام چاغی.
کسمه شیکسته نی دئییردیق به - به.

گونون باتار چاغی کندین بولاغی.
ییغاردی باشینا ائل گوزه للرین.
ایندی اوبولاغین یوخدو نووراغی.
آغلایان گوزلرین سیل گوزه للرین.

آتالار، آنالار گوچدو دونیادان.
گوزلرینده حسرت قلبینده کده ر.
داغیلدی کندیمیز یوخ اولدو واردان.
دوغما ائللریمیز دوشدو در به در.

وار هله چوخ دردی آنا وطنین.
یوزده بیرین یازدیم سنه الله یار.
(غمگین)ی کوورتدی شعرلرین سنین.
سالدی او داغلاردا چنه الله یار.

ایلک ده فه دونیایا گوز آچدیغیم یئر.
ایندی منه یاددی - یادلارا تانیش.
یاز اوخو ائللرین دردینی بیر- بیر.
من یانان اودلارا سنده یان آلیش .

@ShairQamgin
-------------------------

حورمتلی قارداشیم سایین قلم دشیم

الله یاراسدپور جنابلارینا تقدیم ائدیرم

ادریس آقازاده (غمگین) تبریز

شمسی 1394/12/5

میلادی 2016/2/24

#ShairQamgin

برچسبها: ادریس آقازاده, سونگون, روستای سونگون, شعر, سونگون سسی sungun سونگون سسی...